admin 
தென்மேற்கு பருவக்காற்று தீவிரமடைந்துள்ளதன் காரணமாக, காங்கேசன்துறை முதல் மன்னார் ஊடாக கற்பிட்டி வரையான கடற்பரப்புகள் அவ்வப்போது மிகவும் கொந்தளிப்பாகக் காணப்படும்.
மன்னார் முதல் கொழும்பு, காலி மற்றும் ஹம்பாந்தோட்டை ஊடாக பொத்துவில் வரையான கடற்பரப்புகளில் கடலலைகளின் உயரமானது 2.0 முதல் 2.5 மீற்றர் வரை உயரக்கூடும் என எச்சரிக்கப்பட்டுள்ளது.
இந்த அபாயகரமான காலநிலை காரணமாக, ஆழ்கடல் மற்றும் கரையோரப் பகுதிகளில் மீன்பிடி நடவடிக்கைகளில் ஈடுபடும் மீனவர்கள் மற்றும் கடற்படையினர் எவரும் மறுஅறிவித்தல் வரும் வரை கடலுக்குச் செல்ல வேண்டாம் என இயற்கை அனர்த்த எச்சரிக்கை மையம் அறிவுறுத்தியுள்ளது.
ஏனைய கடற்பரப்புகளின் நிலைமை தீவைச் சூழ்ந்துள்ள ஏனைய கடல் பிராந்தியங்களின் நிலவரம் பின்வருமாறு கணிக்கப்பட்டுள்ளது: திருகோணமலை முதல் முல்லைத்தீவு ஊடாக காங்கேசன்துறை வரையான கடற்பரப்புகளிலும், கற்பிட்டி முதல் கொழும்பு, காலி மற்றும் ஹம்பாந்தோட்டை ஊடாக பொத்துவில் வரையான கடற்பரப்புகளிலும் காற்றின் வேகமானது அவ்வப்போது மணிக்கு 50 முதல் 60 கிலோமீற்றர் வரை அதிகரிக்கக்கூடும்.
சிலாபம் முதல் கொழும்பு மற்றும் காலி ஊடாக ஹம்பாந்தோட்டை வரையான கரையோரத்திற்கு அப்பாலுள்ள கடற்பரப்புகளில் பலத்த மழை அல்லது இடியுடன் கூடிய மழை பெய்யக்கூடும்.
இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்று வீசுவதுடன், அக்கடற்பரப்புகள் திடீரென மிகவும் கொந்தளிப்பாக மாறக்கூடும் என்பதால், அவ்வேளைகளில் சிறிய படகுகளைப் பயன்படுத்துவோர் மிகுந்த அவதானத்துடன் இருக்குமாறு கேட்டுக்கொள்ளப்பட்டுள்ளனர்.
